| Da un che 'l compiuter o dopara par lavorare. |
SOLO PER VENETI PUROSANGUE |
Dovì moarghea de mandarme
caéne del porco e fora, tipo che el mondo ze beo ma solo se rispedisso tuto subito, se no
so sfigà, come che el negrodea Alabama che no ga rispedìo a quatromiesinquesento imeìl
no ga fato tempo dire "a" che'l jera za in tel capoto de ebano (vulgo: morto e
stramorto),o el càu bòi John, texano,che ghe ze cascà i tòtani parche no ga risposto
etc.etc.
Par no parlare di quei che me manda imèil disendome che sicome ghe ze un provaider
(fataità mericano) che par ogni imèil che ghe riva dà un centesimo in beneficensa alla
lota contro la jeja scavejòna, eòra bisogna mandarghene na scargà..
O staltro che ga a fiòa co na malatia rarissima che nissuni sa cossa che la gabia ( sto
qua el sta in Missuri ) , che te dà anca el numero de teefonin parchè te ghe teefoni ti
a darghe notissie su cure possibii (che se poi vardè e date scopririssi che ze passai
almanco tre ani da che se partia a caena quindi tanti auguri...). A mi me vien chiedare
robe mediche, che stago in frassion de S. Piero in Gù e go a tersa lementare ?!
E po' quei che i me dise che ge ze el virus dea posta gnetronica che se no te ste tento
teo ciapi anca ti e ze péso che 'ndare co na somala (savemo tutti a cossa che se va
incontro) , alora te ghe da impienire tuti de meil etc.etc.
Quei po' che te manda fotocopia del centro antitumori de Aviano dove i siensiati te dise
che i ovi fa venire el cancaro al bèro e che farse un siampo se peso de fumarse tre
steche de sigarete "Alfa Sensa Filtro".
Ancora quei contro i giaponesi, che secondo iori i metarìa i gatèi in botillia, co l'
urlo di batallia "impienemoghe el sito!"...
De boto me desmentego chi che me manda scrito che ghe ze quei dea Erisson che i dà via i
teefonini come fusse bagigi e adiritura che iori ga provà e funsiona (!?!): basta
"inviare el messajo a tuti quei che te conossi" e te si posto: tempo quindase
dì riva el sior Erisson, Mario Erisson in persona, aministratore delegato ditta omonima,
il
cuale sa tute le meil che te mandi torno, e te porta direto sul portòn de casa el
scartosso col teefonin e custodia de pitone.
A sto punto fème un piasere: mandeme foto porno, film porno, barseete e bueade varie ma
BASTA CO 'STE CAENE,
che n' altro fià e verzo un feramenta e taco vendarle.
Co la speransa che sta meil no rivi in Luisiana a uno che ze drio farse i cassi sui,
distinti saluti
Cice Cagnarìa. |
|
|
|
